ئاياللارغا خاس ئەھكاملار

ھەيز ۋە نىپاس ئەھكاملىرى (سوئال 249 – 255)

249سوئال:ئاياللارغا خاس قانچە ھالەت بار؟#

جاۋاب: ئۈچ خىل ھالەت بار: (1) ئايلىق ھالىتى (ھەيز). (2) تۇغۇتلۇق ھالىتى (نىفاس). (3) ئۈزۈرلۈك ھالىتى (مۇستەھازە).

250سوئال:ئاياللارنىڭ ئايلىق ھالىتى دېگەن نېمە؟#

جاۋاب: ئادەت كۆرۈش يېشىدىكى ئاياللارنىڭ بالىياتقۇسىدىن نورمال كېلىدىغان قېنىدۇر.

251سوئال:ئاياللارنىڭ ئايلىق ئادىتىنىڭ مۇددىتى قانچىلىك؟#

جاۋاب: ئەڭ ئاز بولغاندا ئۈچ كۈن، ئەڭ كۆپ بولغاندا ئون كۈن بولىدۇ، نورمالدا بەش كۈندىن يەتتە كۈنگىچەدۇر.

252سوئال:ئاياللارنىڭ تۇغۇتلۇق ھالىتى دېگەن نېمە؟#

جاۋاب: تۇغۇتتىن كېيىن تۇغۇت قېنىدىن پاكلانغىچە بولغان مەزگىلدۇر (نىفاس).

253سوئال:ئاياللارنىڭ تۇغۇتلۇق ھالىتىنىڭ مۇددىتى قانچىلىك؟#

جاۋاب: ئەڭ كۆپ بولغاندا 40 كۈندۇر. قىرىق كۈندىن ئېشىپ كەتكىنى ئۈزۈر ھېسابلىنىدۇ.

254سوئال:ئاياللار ئادەت كۆرگەن ياكى تۇغۇتتىن كېيىنكى قېنىدىن پاكلىنىپ بولمىغان ۋاقىتلىرىدا قانداق ئىشلارنى قىلمايدۇ؟#

جاۋاب: (1) ناماز ئوقۇش. (2) روزا تۇتۇش. (3) قۇرئان تۇتۇش ۋە ئوقۇش. (4) مەسجىدكە كىرىش. (5) تىلاۋەت سەجدىسى. (6) ئېتىكاپ. (7) كەبىنى تاۋاپ قىلىش. (8) جىنسىي مۇناسىۋەت قىلىش.

255سوئال:ئاياللار يۇقىرىقى ھالەتلىرىدە قىلالمىغان ئىبادەتلىرىنى قانداق قىلىدۇ؟#

جاۋاب: نامازنىڭ قازاسىنى قىلمايدۇ، چۈنكى ناماز ساقىت بولىدۇ. روزىنىڭ قازاسىنى كېيىن تۇتۇپ بېرىدۇ.

ئىستىھازە ۋە تاھارەتسىز چەكلەنگەن ئىشلار (سوئال 256 – 259)

256سوئال:ئاياللارنىڭ ئۈزۈرلۈك ھالىتى دېگەن نېمە؟#

جاۋاب: ئادەت كۈنلىرىدىن ئارتۇق (10 كۈندىن ئاشقان ياكى 3 كۈنگە يەتمىگەن)، تۇغۇتتا 40 كۈندىن ئاشقان قان ئۈزۈرلۈك ھالەت (مۇستەھازە) ھېسابلىنىدۇ.

257سوئال:ئۈزۈرلۈك ھالىتىدىكى ئاياللار ئىبادەتلەرنى قىلالامدۇ؟#

جاۋاب: ئىبادەتلەرنى تولۇق قىلىدۇ، ھەر ۋاخ ئۈچۈن ئايرىم تاھارەت ئېلىپ ناماز ئوقۇيدۇ ۋە روزا تۇتىدۇ.

258سوئال:تاھارەتسىز كىشىلەر ئۈچۈن مەنئى قىلىنغان ئىشلار قايسىلار؟#

جاۋاب: (1) ناماز ئوقۇش. (2) قۇرئان تۇتۇش. (3) كەبىنى تاۋاپ قىلىش.

259سوئال:جۇنۇپ كىشى ئۈچۈن مەنئى قىلىنغان ئىشلار قايسىلار؟#

جاۋاب: تاھارەتسىزگە مەنئى قىلىنغان ئىشلاردىن سىرت، قۇرئاننى يادقا بولسىمۇ ئوقۇش، مەسجىدكە كىرىش ۋە ئۇنىڭدا ئولتۇرۇش مەنئى قىلىنىدۇ.